ნინო გაგელიძე

ჩემთვის სკოლა უნდა იყოს ადგილი, სადაც ყოველი მოსწავლე გრძნობს, რომ მასზე ზრუნავენ, აღიქვამენ ღირსეულ ადამიანად და ინტერესდებიან მისი პიროვნებით. გარემო, სადაც მას აძლევენ არამხოლოდ ცოდნასა და უნარებს, არამედ ეხმარებიან პიროვნულ განვითარებაში, შესაძლებლობების გამოვლენაში და უღვივებენ ინტერესს შემეცნებისადმი. სინამდვილეში ეს ძალიან რთული ამოცანაა.

დღესდღეობით სკოლები უამრავი გამოწვევისა და პრობლემის წინაშე დგას. სწორედ ამ პრობლემებთან გამკლავების პროცესში დამხმარედ წარმომიდგენია სკოლის კონსულტანტი. ეს საქმიანობა, პირველ რიგში, საინტერესო სწორედ იმის გამო მგონია, რომ ორმხრივ მოტივაციაზე დაფუძნებული პროცესია, რომელიც წინასწარვე შეთანხმებად მიზანსა და შედეგებს გულისხმობს და რეალურად სასარგებლო ცვლილებების განხორციელების საშუალებას ქმნის. გარდა ამისა, ვფიქრობ, მრავალფეროვანი სამუშაო იქნება, რამდენადაც, სკოლებს განსხვავებული საჭიროებები და სურვილები აქვთ.

ჩემი გამოცდილებიდან გამომდინარე, ვფიქრობ, შევძლებ, სკოლებს დავეხმარო ხარისხის უზრუნველყოფის მიმართულებით, რაც შესაძლოა, მოიცავდეს ხარისხის უზრუნველყოფის სისტემის შექმნის, მოდიფიცირებისა თუ განვითარების პროცესში კონსულტირებას, არსებული სისტემის ეფექტიანობის შეფასებას, თვითშეფასების პროცესში დახმარების გაწევას, ასევე, რაიმე კონკრეტული პრობლემის კვლევას, შეფასებას, საუკეთესო პრაქტიკის ანალიზსა და რეკომენდაციების წარმოდგენას.

რადგანაც ჩემი მიმართულება, მეტწილად, ხარისხის უზრუნველყოფას შეეხება, იმ პრინციპებს გამოვყოფ, რაც ამ სისტემისთვის სწორად ფუნქციონირებისთვისაა მნიშვნელოვანი:

გუნდურობა − ხარისხზე სკოლის ყველა წევრია პასუხისმგებელი. მიდგომები და პროცესები, რასაც სკოლა ნერგავს ხარისხის უზრუნველყოფის მიზნით, უნდა იყოს გაზიარებული სწორი კომუნიკაციის მეშვეობით, რათა თითოეულ წევრს სისტემურად ჰქონდეს დანახული სკოლაში მიმდინარე პროცესები და მათში საკუთარი როლი.

შედეგზე ორიენტაცია − პროცესები მიზანს უნდა ემსახურებოდეს, გააზრებული იყოს და მაქსიმალურად დაცლილი ზედმეტისაგან.

ღიაობა − პროცესებს ადეკვატური შეფასება და პრობლემის ღიად წარმოჩენა სჭირდება. შეფასების პროცესი საფუძვლად უდევს ცვლილებებს და პროგრესის მიღწევა შეფასდება არსებული მდგომარეობის სწორად განსაზღვრის კვალდაკვალ.

ჩართულობა – ხარისხის უზრუნველყოფის სისტემა უნდა მოიცავდეს სასკოლო პროცესებში ჩართულ ყველა მხარეს, მათ შორის, მოსწავლეებისაც, რომელთა ხმა, ვფიქრობ, დღეს სათანადოდ არ ისმის, ამ დროს კი სწორედ მათთვის მუშაობს სკოლა.

თანამიმდევრულობა – ვფიქრობ, ძალიან მნიშვნელოვანია პროცესების დროში გონივრულად დაგეგმვა, რადგან ამის გარეშე, უნაკლო გეგმაც კი შეიძლება ვერ განხორციელდეს ან ადამიანები ისე გადაიწვან, რომ აღარც დარჩეთ მიღწეული შედეგისგან გამოწვეული სიხარულის მიღების ენერგია. პერსონალის კმაყოფილება კი, ვფიქრობ, ძალიან მნიშვნელოვანი და მოსაფრთხილებელი საკითხია ნებისმიერი ორგანიზაციისათვის.