ნათია ახვლედიანი

სკოლა ჩემი ცხოვრების ძირითადი ნაწილი დაახლოებით შვიდი წლის წინ გახდა, როდესაც ფინანსური სექტორიდან საგანმანათლებლო სფეროში გადმოვინაცვლე. ამ პერიოდში მიღებულმა სხვადასხვა გამოცდილებამ საშუალება მომცა განსხვავებული პერსპექტივებიდან დამენახა სკოლა და სასწავლო პროცესი.

საზღვრებს შიგნით და გარეთაც ჩემთვის თვალშისაცემია, რომ არის სკოლები, რომლებიც ცდილობენ თანამედროვე ტექნოლოგიები გამოიყენონ საგაკვეთილო პროცესში. ეს შეიძლება იყოს რობოტიკის ოთახის მოწყობა,  ჭკვიანი დაფებით საკლასო ოთახების აღჭურვა ან სხვ. ხშირად ეს მცდელობები დგას იმ მოლოდინზე, რომ კონკრეტული ტექნოლოგიები სწავლა/სწავლების პროცესის გაუმჯობესებას შეუწყობს ხელს. პრაქტიკაში კი ერთ-ერთი მთავარი პრობლემა, რაც ამ ტექნოლოგიების შეძენის შემდეგ დგება, მათი სასწავლო პროცესში ინტეგრირებაა. მე ამ პროცესს კიდევ ერთ შრეს შევმატებდი − გამოწვევაა არა უბრალოდ ამ ტექნოლოგიების გამოყენება, არამდე მათი სწავლა/სწავლების პროცესის ხელშემწყობად ქცევა. რადგან თავად ტექნოლოგია არის იარაღი, მთავარი კი ისაა, თუ რას ვაკეთებთ ჩვენ, როგორ მოვიხმართ მათ?

ჩემი ხედვით, თუ ტექნოლოგიები იმისათვის უნდა გამოვიყენოთ, რომ მოსწავლეს შევძინოთ უნარები, რომლებიც ცხოვრების მანძილზე გამოადგება. გარკვეული საბაზო ცოდნის მიღების შემდეგ, ცოდნის პრაქტიკული გამოყენება სხვადასხვა საგნის გაკვეთილზე უნდა მოხდეს. ამისათვის კი საჭიროა, რომ სკოლაში ინტერდისციპლინური აქტივობები დაიგეგმოს. რადგან ყოველ სასკოლო თემს ინდივიდუალური საჭიროებები აქვს, ჩემი ცოდნისა და გამოცდილების შესაბამისად, მოხარული ვიქნები, თუ მექნება სხვადასხვა კუთხით თანამშრომლობის შესაძლებლობა. მაგ. პროფესიული განვითარება: იმის გაცნობიერებით, რომ ტექნოლოგიის ეფექტური გამოყენება მოითხოვს გარკვეულ უნარ-ჩვევებს, მე გთავაზობთ შევიმუშაოთ თქვენი სკოლისათვის საჭირო პროფესიული განვითარების პროგრამები პედაგოგებისთვის. ეს პროგრამები უნდა სცილდებოდეს ტექნიკური ასპექტების შესწავლის დონეს და სთავაზობდეს მასწავლებლებს პედაგოგიკურ სტრატეგიებს, რომლებიც მათ დაეხმარებათ ტექნოლოგია გამოიყენონ სწავლა/სწავლების პროცესის ფასილიტაციისათვის; ინტერდისციპლინური აქტივობები: იმისათვის რომ გადაილახოს ბარიერი თეორიულ ცოდნასა და პრაქტიკულ გამოყენებას შორის, გთავაზობთ ტექნოლოგიების საშუალებით ინტერდისციპლინური აქტივობების სერიის შემუშავებას და სხვ..

იმის გათვალისწინებით, რომ სკოლებს განსხვავებული საჭიროებები აქვს, საკონსულტაციო გადაწყვეტილებები უნდა პასუხობდეს თქვენს მოთხოვნებს − იქნება ეს არსებული ტექნოლოგიების ოპტიმიზაცია, რეკომენდაციები სიახლეების შესახებ, კლუბების ჩამოყალიბება, ინტერდისციპლინური კურიკულუმების შემუშავება თუ პროფესიული განვითარება. ამისათვის კი მზად ვარ აქტიურად ვითანამშრომლო სკოლების ადმინისტრაციასთან და პედაგოგებთან.